唔好意思，在下剛以此攻略買賣咗中國休閒食品（１２６２）並損手離場，但沒有一個策略係百份百準確次次賺錢，所以筆者照同大家分享。如果你見到有一隻新股首日上市收市價比招股價大跌超過１０％，而在次日開市價比首日收市價上升或平開的話，可嘗試以近開市價追入並在即日沽貨，此攻略是從筆者統計了近兩年首日跌幅比較多的十隻新股而來（因搜集數據困難，此十隻新股未敢擔保是兩年最大跌幅），其中六次會買入並有四次穫利（以開市價買入並以同日收市價沽出計、下同），平均利潤3.8％，成功率及利潤率都不俗，但因樣本數有限所以筆者聲明此攻略僅應作為參考，最好是你覺得隻股票質地好才跟。
為何做此統計？筆者想法是大部份新股唔想一上市就大跌咁難睇，但首天成交大，如沽壓太大難托價，次日成交往往少很多，加上不少抽股如仍未止蝕者應傾向等升近招股價才沽，如果首日已大跌托價難度會大減，所以如果次日高開，當日托價行動的可能性會高。但以上想法都係估估吓，睇吓歷史最實際。
十隻新股中四隻次日低開，低開者三隻即日蝕錢，平均蝕3.1％，六隻高開或平開如下：
歲寶百貨（３１２）上市次日（下同）高開3.3％，開市價買即日（下同）賺9.6％。
麗悅酒店（２２６６）高開2.1％，賺5.2％。
翔宇疏浚（８７１）高開１仙，賺5.7％。
泰凌醫藥（１０１１）高開１仙，蝕1.3％。
萊蒙國際（３６８８）平開，賺7.5％。
中國休閒食品高開１仙，蝕4.1％。
最後，不論賺蝕最好即日沽貨。
補充：
今日上市兩隻新股：寶信汽車(1293) 跌14%，中國多金屬(2133) 更勁跌39%。
如果明天兩股高開，你想用本文攻略買入，我有點保留，因寶信汽車比同類股貴，而中國多金屬今年仍未有盈利，股價仍有巨大下行空間。
記住，如想試試明天買左不論賺彩蝕都要即日沽番。
成報吳系講股
2011年12月14日
沒有留言:
張貼留言