內銀股抵買？

　　八月業績期最好一定是寫新公佈的公司業績，一來易搵料，二來可能發掘到好股，剛好見已發盈警的克莉絲汀（１２１０）半年業績，雖知其會虧損，但因為公司和筆者太太同名，俾面下亦望望睇下業績差有冇ｅｘｃｕｓｅ，事關在我眼中賣飽餅都算一門幾好兼不受經濟好壞影響的生意，可惜睇完後只得一個字：劣。

　　公司今年２月才上市，立即由１１年半年賺千幾萬轉為今年蝕千幾萬，就算計入上市開支今年８百萬都不足以由賺變蝕，可惜抽新股已經入肉超過４成，如果港交小加繼續咁程度的監察水平，奉勸各位抽新股不如拿點錢做善事好過。

　　講回其他公司，本港上市內銀股已經有４間公佈中期業績，盈利增長雖則放緩，仍比去年為佳，每股盈利增長暫時最高民行（１９８８）３２％，重農行（３６１８）和招行（３９６８）皆２５％，最低中行（３９８８）仍有７％，但內銀股估值之低殘程度，卻似業績將會進入大衰退的邊緣般，只要簡單將１２年盈利假設為上半年兩倍，便知最高市盈率的招行亦只有５倍多，其餘３內銀更不足５倍。

　　此情此景，令我想起兩段歷史，花旗在０７年亦僅11.8倍ＰＥ，在盈利前四年每年複合增長１５％的前題下，當時道指最高１４０００點花旗算便宜，但後來大家才發現股價可以跌剩幾巴仙；另一次是９０年代，百年老店富國銀行因加州房地產危機，市場擔心會倒閉而股價大跌，股神巴菲特卻在估值低殘大手入貨，當危機過後，富國替其賺取數以倍計利潤。

　　現在以數字估值分析內銀，會得出抵買兩字，但其實卻如上述事例，要數年後才會知道這是一個極好或極差的投資，筆者當然沒有股神高強的洞悉力，所以同意內銀股抵買，但不可瞓身買。下週開始，筆者會轉寫本欄週四及週五，請繼續支持。

（利益申報：筆者及客戶持有１９８８民行）

2012年8月27日

成報吳系講股